"Young Lions Azerbaijan 2022" müsabiqəsində iştirak meyarları aşağıdakı kimidir: 

- İki nəfərdən ibarət komanda yaratmaq;

- İştirak qaydalarını diqqətlə oxumaq;

- Qeydiyyat üçün ərizə doldurub təşkilatçıya təqdim etmək;

Qeydiyyat üçün müraciətlər iki kateqoriya üzrə qəbul olunur: Film və Print. Qeydiyyat ərizələrinin qəbulu 13 aprel 2022-ci il, Çərşənbə, Bakı vaxtı ilə saat 24:00-da başa çatır.

Müsabiqəyə kreativ sahədə çalışan mütəxəssislər — reklam və ya digital agentliklərin əməkdaşları, studiya və ya prodakşn şirkətinin əməkdaşları və eyni zamanda frilanserlər də qatıla bilərlər.

Komandanın üzvləri eyni şirkət əməkdaşları olmaya da bilər.

Komandanın hər iki iştirakçısı “Young Lions” müsabiqəsinin beynəlxalq meyarlarına cavab verməlidir:

- Film və Print kateqoriyalarında yarışan iştirakçıların doğum günü 24.06.1990-dan sonrakı tarixdə olmalıdır;

- İştirakçı Azərbaycan Respublikasının vətəndaşı olmalıdır;

- İştirakçı İngilis dilini yaxşı başa düşməli və danışmalıdır.

Müsabiqənin hər bir iştirakçısı bir kateqoriya (Film və ya Print) üzrə qeydiyyatdan keçə bilər. Müsabiqədə yalnız qeydiyyatdan keçmiş komandalar iştirak edə bilər. 

Hər bir kateqoriyada ən azı 5 komanda qeydiyyatdan keçməlidir. Bir kateqoriyada iştirak edən komanda sayı 5-dən az olduqda, həmin kateqoriya üzrə müsabiqə keçirilməyəcəkdir.

Hər kateqoriya üçün təmin edilən brifə ingilis dilində məlumat, eləcə də iştirakçıların üzərində işləyəcəkləri məqsəd və vəzifələr daxildir. Brif müsabiqə cədvəlinə uyğun olaraq təqdim olunacaq:

Film və Print kateqoriyaları üzrə iştirakçılar 16 aprel tarixində brifi həm online qaydada, həm e-mail vasitəsilə elektron formada alacaqlar. Print kateqoriyası üzrə brif toplantısı Bakı vaxtı ilə saat 12:00-da, film kateqoriyası üzrə isə 13:30-da Zoom-da online qaydada baş tutacaq. Print kateqoriyası üzrə işin ən gec təhvil verilmə vaxtı 17 aprel saat 13:00, film kateqoriyası üzrə işin ən gec təhvil verilmə vaxtı isə 19 aprel saat 14:30-dur.

Müsabiqə çərçivəsində yaradılan bütün işlər müvafiq briflərdə göstərilən tələblərə uyğun olmalıdır.

21-30 aprel 2022 tarixləri arasında təşkilatçı tərəfindən seçilmiş münsiflər heyəti iki kateqoriyanın hər birində qalib gələn komandaları müəyyənləşdirəcək. Münsiflər heyətinin qərarı müzakirə olunmur və dəyişdirilə bilməz. Təşkilatçı münsiflər heyətini seçmək və zəruri hallarda dəyişdirmək hüququna malikdir.

Münsiflər Heyəti hər iki kateqoriya üzrə iki iştirakçıdan ibarət qalib komandanı müəyyənləşdirir.

Müsabiqənin əsas mükafatı Film və Print kateqoriyalarında hər kateqoriya üçün iki nəfərdən ibarət komandanın "Young Lions Competitions 2022" finalında iştirak etmək hüququdur. Qaliblərin festivalda iştirak, yol və qalmaq xərcləri Azərbaycan Respublikası Mədəniyyət Nazirliyi tərəfindən qarşılanacaq. Bir nəfər üçün festivalda sadəcə iştirak haqqı €1535 təşkil edir. 
 

Təqdim olunan işlərin səviyyəsi aşağı olduqda, Təşkilatçı, Münsiflər Heyəti ilə razılaşdıraraq, qalibi müəyyən etməmək hüququna malikdir.

Müsabiqə iştirakçıları Film və Print kateqoriyalarının hər birində ortaya qoyduqları işlərdə istifadə etdikləri bütün materialların (fotoşəkillər, illüstrasiyalar, musiqi və s.) üçüncü tərəflərin müəllif və mülkiyyət hüquqlarını pozmadığına və işlərinə dair hər hansı bir iddianın olmadığına razıdırlar. Təqdim olunan hər hansı bir işdə üçüncü şəxslərin materiallarından qanunsuz istifadə olunduğu halda, təşkilatçı həmin işi müsabiqədən kənarlaşdıra bilər. “Young Lions Azerbaijan 2022” müsabiqəsində təqdim olunan bütün işlərin müəllifliyi və həmmüəllifliyi iştirakçıların ixtiyarındadır, lakin işlər kommersiya məqsədləri üçün istifadə edilə bilməz. Müsabiqədə iştirak etmək üçün işlərini təqdim edən iştirakçılar, təşkilatçıya (red. Azərbaycan Respublikası Mədəniyyət Nazirliyi və Kreativ Azərbaycan nəzərdə tutulur) işlərini istənilən formada dəyişdirmək və nəşr etmək üçün məhdudiyyətsiz hüquq verirlər.

Qeydiyyat üçün ərizə dolduraraq iştirakçılar Azərbaycanda təşkilatçı tərəfindən keçirilən “Young Lions Azerbaijan 2022” qaydaları ilə razılaşırlar.